菊千代さん「島の妖怪」語る・与論くとぅば

菊千代さん「島の妖怪」語る・与論くとぅば
あんどぅるまちちきぃてぃ

菊千代さん

[音声で聞く]　　[音声を聞くために]

　与論ぬ島なんや　「ハタパギマンジャイ」ちゅうる　妖怪ぬ居たん。

　昼や　洞窟なが　森林ぬ中ながなん居いしが　夜ぬ潮時なりぼー　ピッチャイッピッチャイ　行灯火点きてぃ　海かてぃ行きゅん。ふとぅし　生雨がま降ぃぬ　夜ぬ潮時ゃー「ハタバギマンジャイ」ぬ　良か潮時えーたん。

　浜かてぃ至ちゃーたる「ハタパギマンジャイ」や　行灯火点きたるまま　波打際ぬ潮ぬ中かてぃ　入ち行きゅん。

　海ぬ中かてぃ　入きゅうしとぅまーじん　うぬ小たーましゅる明がいや消てぃ　ちゃーき沖ぬ潮ぬ上なん　大しゃなたい　小たーまなたい　二ちなたい　三ちなたい　離りたい　ぴっちちゃいし　点かゆん。潮ぬ満ちゃぼー　また行灯火点きてぃ　元来ちゃる道なーから戻ん。

　「ハタパギマンジャイ」や　いぇーじらさる妖怪なてぃ　悪口えーかしらんぼー　悪さる事ぁしらんぬ。

　「ハタパギマンジャイ」んちゃん　近くのんてぃ見ちゃんちゅーる人ぬ話なんゆりぼー　体ぉ小たーまし　足ゃー一ちがてぃ　頭なん笠被とぅんがねっし　見ゃーりゅーたんち言ゅん。

　昔ゃー　うっぷーさ居たる「ハタパギマンジャイ」えーしが　今ぉ　見ちゃんちゅーる人ゃ　ふらじ。また　私ん　見ちゃる事ぁ　無んぬ。世ぬ中ぬ　盛いゆる波なん追ゎーりてぃ　何処か遠さる島かてぃ　逃ぎてぃげーら。

　今ぬ子供達かてぃ　がっしゅる物語しち　聞かちゃんちん　うりゃー信じらんぬ。私んあんぬ時「ハタパギマンジャイ」ち言ゃーりたる　あぬ明がいぬ姿ぅ　今が今　分かとぅらんぬ。（与論民俗村創設者）