宮城信勇さん「古里の方言」語る・石垣・四箇言葉

宮城信勇さん「古里の方言」語る・石垣・四箇言葉
なだっさ　かいしゃーん

宮城信勇さん

[音声で聞く]　　[音声を聞くために]

　「八重山言葉ー　優さ美しゃーり　沖縄言葉ぬ　中なんが　格別美しゃーん　フランスぬ　言葉かいどぅ　似やーるぃ」。くれー　伊波普猷先生ぬ　弟月城で言のーるぃ　物識りぅぬ　言んこーった　言葉で　「天文屋ぬ　御主前」ぬ　書こーった　書物んがどぅ　書かれーるぃゆー。

　我　言んき申さり　言葉しぇー　あんじ　思よーらるん　はずぃやそんが　婦人方　わきてぃ　上級士族ぬ　夫人様ぬ　言んこーるぃ言葉ー　確とぅ　優さ美しゃーろーったゆー。

　あんじるぃ　言葉　しょーるぃ　人でーめ　在らなー　なり　寂さ　残念　しーるぃ　くぬ頃ゆー。

　「己島ぬ　言葉　忘きっかー　生り島ゆん忘きどぅ　すぃー」で　言んく　昔言葉ぬあそんが　人人間や　物言言葉しどぅ　物ん　思ーり　考いん　しらり　言葉ぬ　無ーなー　なるぃっかー　うぬ　思い　うぬ　考いん　無ーなーどぅ　なるぃで　言んく　事ゆー。かんじ　寂さ　悲さーるぃ　事で　あんねーら。

　良い格好に　学識りぅ　先生方ぬ　「今なんが各島々ぬ　言葉ゆ　子孫かい　習ーし　伝やー　行ら　でぃー」で　言んこーりりゃ　「したい　良ー　言んこーりった　皆様かい　どーでぃん　良ー　言んき聞かし賜ーり」で　願いるぃ　次第ゆー。（沖縄・八重山文化研究会会長）